Амерыканскае выданне The Washington Post выпусціла матэрыял, у якім сцвярджаецца, што разведка адной з еўрапейскіх краін атрымала дакумент, падрыхтаваны для Крамля за тыдзень да перамоваў паміж Расіяй і ЗША ў Эр-Рыядзе 18 лютага. Ён нібыта быў створаны аналітычным цэнтрам, які цесна працуе з Пятай службай ФСБ, што курыруе аперацыі ва Украіне, паведамляе тэлеканал «Дождь».
У гэтым дакуменце выкладзеныя максімалісцкія патрабаванні Расіі да спынення вайны ва Украіне. У прыватнасці, у ім:
- папярэднія планы Дональда Трампа што да заключэння мірнага пагаднення цягам 100 дзён ацэненыя як «немагчымыя», паведамляецца, што «мірнае вырашэнне ўкраінскага крызісу не можа адбыцца да 2026 года»;
- адпрэчваецца любы план па адпраўцы міратворцаў ва Украіну (бо «любыя сілы будуць пад сур’ёзным заходнім уплывам») і настойваецца на прызнанні суверэнітэту Расіі над захопленымі ёю ўкраінскімі тэрыторыямі;
- гаворыцца пра неабходнасць стварэння буфернай зоны на паўночным усходзе Украіны на мяжы з расійскімі рэгіёнамі, а таксама дэмілітарызаванай зоны на поўдні Украіны паблізу Крыма, уключаючы Адэскую вобласць;
- абмяркоўваецца неабходнасць «поўнага дэмантажу» цяперашняга ўкраінскага ўрада і адмова Кіева ад сяброўства ў NATO.
У дакуменце прапаноўвалася, што Расія пагодзіцца не размяшчаць свае балістычныя ракеты сярэдняй далёкасці «Арэшнік» у Беларусі і на мяжы з ЕС, у той час як узамен Злучаныя Штаты пагадзіліся б не размяшчаць новыя ракетныя сістэмы ў Еўропе. А яшчэ — што Расія спыніць пастаўкі зброі ў краіны, якія лічацца «недружалюбнымі» да Злучаных Штатаў, у той час як Злучаныя Штаты перастануць узбройваць Украіну.
Там таксама выкладзеныя спосабы, з дапамогай якіх Расія магла б умацаваць свае перамоўныя пазіцыі шляхам пагаршэння напружанасці паміж Злучанымі Штатамі, Кітаем і Еўрапейскім саюзам. А таксама прапанаваўшы ЗША доступ да карысных выкапняў, у тым ліку на тэрыторыях, якія яна захапіла ва Украіне, дзе ёсць запасы рэдказямельных металаў.
The Washington Post нагадвае, што 24 лютага Уладзімір Пуцін акурат казаў пра гэта, калі прапанаваў запрасіць амерыканскія кампаніі для распрацоўкі расійскіх радовішчаў карысных выкапняў, у тым ліку на акупаваных тэрыторыях Украіны.
Амерыканскае выданне таксама прыводзіць каментар прэс-сакратара прэзідэнта Расіі Дзмітрыя Пяскова з нагоды атрыманага ім дакумента. Той назваў гэтыя рэкамендацыі «вельмі супярэчлівымі», а таксама заявіў, што Крэмль «не ў курсе такіх рэкамендацый» і што ён працуе «з больш прадуманымі варыянтамі».