Мінулай ноччу карыстальнікі Беларусі сутыкнуліся з абмежаваннем доступу да інтэрнэту. Паводле інфармацыі чытачоў «Люстэрка» і шэрагу тэлеграм-каналаў, праблемы закранулі сайты, мэсэнджары, сацыяльныя сеткі і відэахостынг YouTube.
Перабоі доўжыліся некалькі гадзін па ўсёй краіне, аднак падчас выкарыстання VPN у большасці карыстальнікаў доступ да ўсіх сэрвісаў захоўваўся. Інтэрнэт-злучэнне было адноўленае прыкладна ў 2.30−3.00.
На сайце «Белтэлекама» паведамлялася пра планаваныя работы 10 студзеня 2025 года. У паведамленні адзначалася, што з «00.00 да 07.30 магчымыя абмежаванні доступу да інтэрнэту для абанентаў Мінска, Гомеля і Гомельскай вобласці».
Гэта не першы выпадак маштабных перабояў у працы сеціва. Апошнім разам такая сітуацыя назіралася ў навагоднюю ноч падчас выступу лідаркі беларускіх дэмсілаў Святланы Ціханоўскай.