У Віцебску маці траіх дзяцей паспрачалася з іх бацькам у судзе праз аліменты: яна даведалася, што ён уладкаваўся дальнабойшчыкам у польскую фірму, і хацела, каб ён плаціў больш, а мужчына ўсё адмаўляў. Да таго ж ён забяспечваў старэйшага сына, які жыве з ім. На чый бок стаў суд? Расказваем на аснове апублікаванага судовага рашэння.
Ганна і Алег (імёны выдуманыя) жылі разам не распісваючыся і праз гады разышліся. У пары двое сыноў і дачка. Пасля растання ў 2022 годзе Ганна ўжо звярталася ў суд па аліменты, і Алега абавязалі плаціць на траіх дзяцей 50% свайго заробку да іх паўнагоддзя.
Пазней пара заключыла пагадненне пра тое, што старэйшы сын будзе жыць з бацькам, але Алег працягваў плаціць жонцы аліменты на траіх, толькі праз дзевяць месяцаў суд пастанавіў зменшыць выплаты: цяпер мужчына мусіў плаціць былой толькі за дваіх дзяцей, аддаючы 182,2 рубля на кожнага.
Ганну гэта, відавочна, не задавальняла. Праз некалькі месяцаў яна падала новы пазоў і заявіла: былы муж схаваў ад першага суда, што працуе дальнабойшчыкам у Польшчы, і ёй стала вядома пра гэта нібыта толькі цяпер — хоць, запэўнівала яна, працоўная дамова ў яго заключаная з 2021 да 2024 года.
Паводле звестак жанчыны, аклад Алега па дамове — 3100 злотых (гэта крыху больш за 700 еўра). Аднак Ганна была ўпэўненая, што гэта толькі на паперы: яна пашукала ў інтэрнэце вакансіі фірмы, дзе працуе былы, і выявіла, што там абяцаюць заробак ад 2220 да 3193 еўра, а таксама «нагугліла», што мінімальны даход міжнародніка ў Польшчы — 1200 еўра.
Такім чынам, заявіла жанчына ў пазове, Алег таксама зарабляе ніяк не менш за 1200 еўра і, на яе думку, абавязаны плаціць аліменты хаця б з гэтай сумы. Аднак ён хавае даходы і плаціць зусім мала, зыходзячы з бюджэту пражытачнага мінімуму, што, паводле Ганны, «ставіць яе ў вельмі цяжкае матэрыяльнае становішча і парушае інтарэсы няпоўнагадовых дзяцей, пры гэтым яна таксама не працуе і не мае пастаяннага заробку».
Жанчына спачатку папрасіла спагнаць з былога мужа аліменты ў памеры 25 базавых велічынь на траіх дзяцей, але пазней змяніла пазоў, бо старэйшаму сыну споўнілася 18 гадоў. Яна запатрабавала, каб на малодшых сына і дачку Алег плаціў 33 працэнты заробку (а не фіксаваныя 182 рублі на кожнага, як раней).
Мужчына падаў пазоў у адказ, у якім нагадаў, што з чэрвеня 2023 года ён плаціў былой аліменты на траіх дзяцей, хоць старэйшы сын жыў з ім. Алег сцвярджаў, што ён не працуе ў Польшчы і наогул не мае працы, таму нават 364 рублі, якія ён плаціць, — занадта шмат, і патрабаваў паменшыць суму аліментаў на дзяцей, якія засталіся ў жонкі, удвая — да 182 рублёў на абаіх разам.
На судзе Ганна выказалася рэзка супраць такога павароту. Яна заявіла, што Алег і так не ўдзельнічае ва ўтрыманні малодшых сына і дачкі, не выплачваў нават той сумы, якая была прызначаная раней, у яго стварылася пазычанасць, і ні пра якае памяншэнне не можа быць і гаворкі. Алег жа настойваў, што ў яго таксама ёсць дзіця на ўтрыманні — старэйшае: хай сыну і споўнілася 18, але ён яшчэ не працуе і жыве за кошт бацькі, таму плаціць столькі на астатніх дзяцей мужчына не ў стане.
Выслухаўшы абодва бакі і вывучыўшы іх доказы (а па сутнасці, у абаіх нічога, акрамя словаў, не было), суд прыйшоў да высновы, што прасцей за ўсё будзе вырашыць пытанне стандартна: раз закон прадугледжвае на дваіх дзяцей аліменты ў памеры 33% заробку і няпоўнагадовыя дзеці засталіся ў маці, значыць, бацька мусіць выплачваць ёй гэтыя 33%, пры гэтым плацяжы павінныя складаць не менш за 75% бюджэту пражытачнага мінімуму.
Такім чынам, пазоў Ганны быў задаволены, а пазоў Алега — адхілены. Мужчыну таксама абавязалі кампенсаваць былой жонцы выдаткі на юрыстаў на суму 700 рублёў.
Чытайце таксама
