На аэрадроме ў Мачулішчах адбылося некалькі выбухаў, паведамляе ініцыятыва BYPOL. Пра «хлапкі, падобныя да выбухаў», «Люстэрку» таксама пісалі чытачы. Сабралі ўсё, што вядома пра здарэнне.
Што здарылася
У BYPOL паведамілі, што ўдзельнікі плана «Перамога» расказалі пра два выбухі ў Мачулішчах раніцай. Паводле іх інфармацыі, у выніку былі пашкоджаныя расійскі ваенна-транспартны самалёт і снегаўборачная тэхніка. Мяркуючы з паведамленняў у мясцовых чатах, гучныя гукі былі чуваць у каля 8−9.40 раніцы. Некаторыя кажуць, што чулі моцны выбух ноччу.
Пасля таго, што здарылася, як пісалі жыхары навакольных населеных пунктаў у мясцовых тэлеграм-чатах, ля аэрадрома бачылі вялікую колькасць вайскоўцаў. Са словаў адной з карыстальніц, на аэрадром прыязджалі Следчы камітэт і хуткая, «стаялі вайскоўцы і аўтаматчыкамі». У іншым чаце людзі пісалі, што вуліца Спартыўная была «ўздоўж забітая тэхнікай з вайскоўцамі ў броніках», «у той бок нядаўна праехала сем ваенных машын з аўтаматчыкамі».
Вакол бачылі таксама машыны ДАІ, яны правяралі багажнікі аўто, што праязджалі міма, сумкі і дакументы кіроўцаў. Паводле інфармацыі тэлеграм-канала «Беларусь за МКАДом», экіпажы дагэтуль працуюць на дарозе са Слуцка ў Мінск, аўто правяраюць каля вёсак Дзергаі і Плябанцы.
Пазней паведамленні ў чатах пачалі выдаляць. Як піша тэлеграм-канал «МотолькоПомоги», па кватэрах пачаў хадзіць АМАП у поўным абмундзіраванні. «Паводле словаў людзей, ходзяць па сваіх БЧБ-спісах, шукаюць, хто нешта зрабіў». А тэрыторыю вакол Мачулішчаў паўтары гадзіны патруляваў верталёт.
Бліжэй да вечара пра выбухі пад Мінскам напісаў расійскі праўладны ваенкар Сямён Пегаў, аўтар праекта WarGonzo. Паводле яго словаў, інфармацыю пацвердзілі «крыніцы ў Беларусі». Ён дадаў, што, «хутчэй за ўсё», гэта былі «атакі беспілотнікаў на вайсковую інфраструктуру, на якой могуць быць разгорнутыя ў тым ліку аб’екты расійскіх ВКС».
Паводле наяўнай у BYPOL інфармацыі, у Мачулішчах быў падарваны самалёт ДРЛВ А-50 (самалёт далёкага радыёлакацыйнага выяўлення і кіравання).
«У выніку двух выбухаў пашкоджанні атрымалі пярэдняя і цэнтральная часткі самалёта, пашкоджаная авіёніка і радыёлакацыйная антэна. Пашкоджанні сур’ёзныя, самалёт дакладна ўжо нікуды не паляціць», — гаворыцца ў паведамленні ініцыятывы.
Што кажуць у Мінабароны і МНС
У цэнтры аператыўнага кіравання МНС па Мінскім раёне журналістцы «Люстэрка», якая патэлефанавала як жыхарка рэгіёна, сказалі, што інфармацыі пра выбухі не паступала.
Міністэрства абароны Беларусі таксама не каментавала сітуацыю. Мы патэлефанавалі ў ведамства па нумары «тэлефона даверу», супрацоўнік па тэлефоне толькі, як адбывалася і раней, супакоіў:
— Вы ведаеце, там нічога сур’ёзнага не адбылося, можаце не перажываць.
— Людзі кажуць, выбухі былі. Нешта здарылася?
— Ну, гэта хлапкі. Нічога страшнага не адбылося.
— Ясна. А чаму вайскоўцаў там тады так шмат?
— Ну, прыехалі. Трэніруюцца, вучацца. Нічога наогул, можаце не перажываць, — запэўнілі ў Мінабароны і не сталі агучваць падрабязнасці.
Чытайце таксама
