У паліцыі акругі Маямі-Дэйд расказалі пра высновы па выніках расследавання прычыны смерці беларускага экс-хакеіста і трэнера Канстанціна Кальцова, піша «Трыбуна».
«На падставе расследавання і доказаў, сабраных нашым бюро забойстваў, гэты інцыдэнт класіфікаваны як суіцыд», — адказаў на запыт «Трыбуны» прадстаўнік паліцыі.
Нагадаем, Кальцоў некалькі гадоў сустракаўся з цяперашняй першай ракеткай свету Арынай Сабаленка.
Смерць Канстанціна Кальцова
Экс-хакеіст зборнай Беларусі Канстанцін Кальцоў памёр у 42 гады. Трагедыя адбылася ў гатэлі ў Маямі, дзе спыняўся спартовец.
19 сакавіка паліцыя Маямі выпусціла з гэтай нагоды афіцыйную заяву:
«Паводле звестак следства, у панядзелак, 18 сакавіка 2024 года, прыкладна ў 12.39 паліцыя і пажарныя ратавальнікі Бал-Харбара былі скіраваныя ў гатэль St. Regis Bal Harbour Resort, 9703 Collins Avenue, з нагоды мужчыны, што саскочыў з балкона. Аддзел забойстваў паліцыі акругі Маямі-Дэйд узяў на сябе расследаванне меркаванага самагубства Канстанціна Кальцова (04/17/1981). Ніякіх падазроных абставінаў не выяўлена».
20 сакавіка былая жонка Кальцова Юлія Міхайлава ў інтэрв'ю «Люстэрку» выказала ўпэўненасць, што гэта няшчасны выпадак: «У Канстанціна былі далей зарэзерваваныя апартаменты ў іншым месцы. Былі аплачаныя пакупкі, якія яшчэ не прыйшлі. Надоўга арандаваная машына. То-бок ён не збіраўся паміраць. Усякае, вядома, можа ў галаву стрэльнуць, але трагедыі нічога не прадказвала».
У пачатку красавіка стала вядома, што цела хакеіста крэміравалі ў ЗША. Яго прах пазней даставілі ў Беларусь. Канстанціна пахавалі на могілках пры вёсцы Чудзенічы (Лагойскі раён).
Сабаленка толькі 21 сакавіка апублікавала сторыс з нагоды таго, што адбылося: «Смерць Косці — неймаверная трагедыя. І хоць мы больш не былі разам, маё сэрца разбітае. Калі ласка, паважайце маё асабістае жыццё і асабістае жыццё яго сям'і ў гэты цяжкі час».
Пасля гэтага яна гуляла ў Маямі (выступ абмежаваўся двума матчамі) у чорнай форме. 2 красавіка ў тэнісісткі выйшла новая сторыс з адсылкай да апошніх падзей: «Хачу падзякаваць усім прыхільнікам за любоў і падтрымку ў гэты цяжкі час. Вашыя добрыя словы так шмат значаць для мяне, я нашу іх з сабой кожны дзень. Я вам вельмі за ўсё ўдзячная».
У жніўні Арына прызналася, што смерць Кальцова паўплывала на яе псіхічнае здароўе.
Цяпер беларуска сустракаецца з бразільскім бізнесоўцам і аўтагоншчыкам Георгісам Франгулісам. Сабаленка таксама рэкламуе прадукты Oakberry — кампаніі, якой валодае Франгуліс.
Чытайце таксама
