Мінчук прыехаў у госці да сына і заспеў яго з кампаніяй падчас ужывання наркотыкаў. Мужчына замкнуў іх у кватэры і патэлефанаваў на нумар 102, расказалі ў МУС.
Мінчук, які патэлефанаваў у міліцыю, расказаў, што ў яго ў кватэры «сын з кампаніяй — наркаманы».
«Карацей, яны зладзілі там прытон. Я зайшоў, там шпрыцы валяюцца, там поўны вэрхал. І яны нешта шугануліся, там пачалі адразу нешта хаваць», — паведаміў мужчына.
Міліцыянты, што прыехалі на месца (мяркуючы з відэа МУС, мінчук чакаў іх ля пад’езда), знайшлі ў кватэры шалі, зіп-пакеты, ізастужку, шпрыц і скрутак з парашком. Усю кампанію даставілі ў РУУС.
«Устаноўлена: 26-гадовы сын заяўніка разам са сваёй знаёмай каля месяца працавалі кур’ерамі інтэрнэт-крамы па продажы наркотыкаў. Яны забіралі буйныя партыі „тавару“ ў лясным масіве сталіцы, фасавалі на дробныя дозы і раскладвалі па схованках», — расказалі ў МУС.
Следчымі ў дачыненні да пары закладчыкаў распачатая крымінальная справа за нарказбыт. Правяраецца датычнасць астатняй кампаніі да аналагічных злачынстваў.